صباحكم سكر

كريب سوزيت

مرحبا,
ايام الدوام الصبح بكير بكون عجقة كتير، لبين ما البس الأولاد و افطرهم و يطلعوا على المدرسة بكون بدوووور متل النحلة من دون توقف, اما اذا انا وصلتهم بضيع كمان ساعة على الطريق...مشان هيك الفطور بالعادة بكون سريع و من حواضر البيت و خزانة المونة ( الحمدالله يا رب يديم النعمة). بس لما تيجي عطلة نهاية الأسبوع، مرات الواحد بحب يدلل حالو الصبح بفطور زاكي و مرتب و مختلف عن كل يوم متل الكريب، الوافل والبانكيك او حتى وصفات البيض متل الفريتاتا، الكيش و ال egg benedict
....الخ و أشياء كتيرة كمان، انشالله رح نتطرق لها مع بعض في وقت لاحق. 
و يمكن بعض الناس بفكروا انه هادا الحكي بكلفهم كتير، و ما بقدروا عليه، انا بحب أأكد للجميع انه كل الأدوات متوفرة بكل بيت و بأقل التكاليف و اي غرض مش متوفر بخزانتكم، بنقدر نلاقيلو بديل بكل سهولة، يعني باختصار شديد انه الموضوع مش معقد ابدا ولا رح يقيدكم.

اليوم اخترتلكم وصفة كتير طيبة و هيه الكريب سوزيت، طبعا وصفة عجينة الكريب الاساسية واحدة، بس هون الاختلاف بكون بالإضافات و الحشوات، اللي ممكن تكون مالحة او حلوة. 
كريب سوزيت هيه عبارة عن كريب مع السكر و الزبدة المكرملين و صوص البرتقال 
عادة يتم حرق السكر و الزبدة بإضافة مشروب كحولي و إشعاله امام الضيوف بس انا اليوم طبعا عملتلكم ياه بطريقة اخرى و نتيجة مشابهة جداً بدون اضافة اي كحول 
اذا حبيتو تعرفوا اكثر عن خلفية اسم سوزيت ادخلوا على اللينك المرفق في قصة طريفة عن
الموضوع. http://en.m.wikipedia.org/wiki/Crêpe_Suzette

لعجينة الكريب 

١\٢ ١ كوب طحين
رشة ملح 
٣ بيض حجم كبير 
١\٢ كوب سكر 
١ ملعقة صغيرة فانيللا 
١\٨ ملعقة صغيرة نكهة اللوز 
١ ملعقة صغيرة برش برتقال 
٢ كوب حليب سائل 

للتطبيق 

١\٢ كوب زبدة نقية (يرجى قراءة الملاحظة في الأسفل)
سكر ابيض حبيبات للوجه 
Blue torch (مسدس الاشتعال المخصص للطبخ) 

صوص البرتقال 

١\٢ ١ كوب عصير برتقال طازج 
٣ ملعقة كبيرة سكر ابيض 
١ ملعقة صغيرة برش برتقال 
١\٨ ملعقة صغيرة نكهة اللوز 
١ ملعقة كبيرة زبدة نقية ( مأخوذة من الكمية المذكورة سابقا) 
٣\٤ ملعقة صغيرة نشا 
٣ حبات برتقال مقطع شرائح ( كما هو موضح في الصورة اعلاه ) 

لعمل عجينة الكريب 

نخفق البيض مع السكر و الفانيللا و نكهة اللوز حتى تظهر بعض الرغوة 
نضيف كمية الحليب و برش البرتقال و نحرك 
نضيف كمية الطحين و نخفق للحصول على خليط قليل الكثافة 
نضع الخليط في الثلاجة لمدة نصف ساعة حتى يرتاح 
ندهن مقلاة الكريب الساخنة بالزبدة النقية ثم نصب ١\٤ كوب من العجينة على المقلاة في كل مرة، و نوزعها على كل المقلاة للحصول على كريب رقيق قدر الإمكان و نتركه ليتحمر ثم نقلبه على الوجه الاخر حتى يتحمر أيضاً و نكرر مع بقية الكمية 
نقوم بلف كل دائرة على شكل مثلث كما هو موضح في الصورة

نرش قليلا من السكر الأبيض على الوجه و باستخدام المسدس نقوم بحرق السكر على الوجه 

لعمل صوص البرتقال 

في كسرولة صغيرة نضيف السكر و نتركه حتى يبدأ بالتحول الى كراميل ذهبي اللون، ثم نضيف ملعقة الزبدة النقية و ٣\٤ كمية عصير البرتقال و برش البرتقال و نتركه على نار هادئة حتى يبدأ بالغليان 
نذيب النشا مع ١\٤ كمية العصير المتبقية و نضيفها بالتدريج على الصوص و نحرك حتى يتكاثف قليلا 
نرفعه عن النار و نتركه جانبا حتى يصبح دافئا و يقدم مع الكريب الساخن المكرمل

ملاحظة 

الزبدة النقية (clarified butter) 
للحصول على ١\٢ كوب 
نذوب ١ أصبع زبدة (١٠٠غم) في كسرولة صغيرة على نار هادئة و نتركها حتى يبدأ لون الاطراف بالتحول الى ذهبي مع استمرار المراقبة، نرفعها عن النار و نحرك الكسرولة حركة خفيفة دائرية ثم نتركها جانبا، نلاحظ نزول حبيبات صغيرة بنية اللون الى القاع و بقاء الزبدة النقية في الأعلى، نصفيها و تكون جاهزة للاستخدام 


يومكم سعيد و مبارك